ՄԱԿ-ի Խոշտանգումների դեմ կոմիտեում Հայաստանի Հանրապետության երրորդ պարբերական զեկույցի քննարկումը

11 մայիսի, 2012

Մայիսի 10-ին և 11-ին Ժնևում ՄԱԿ-ի Խոշտանգումների դեմ կոմիտեն իր 48-րդ նստաշրջանում քննարկեց Հայաստանի 3-րդ պարբերական զեկույցը ՄԱԿ-ի Խոշտանգումների և այլ դաժան, անմարդկային կամ նվաստացնող վերաբերմունքի և պատժի դեմ կոնվենցիայի իրականացման վերաբերյալ:

ՀՀ պատվիրակության կազմում, որը ղեկավարում էր ՀՀ արդարադատության նախարարի տեղակալ Եղիշե Կիրակոսյանը, ընդգրկված էին ՀՀ արտաքին գործերի, պաշտպանության, արդարադատության նախարարությունների, գլխավոր դատախազության, վճռաբեկ դատարանի, ոստիկանության ներկայացուցիչները:

Զեկույցի քննարկումն անցավ կառուցողական երկխոսության մթնոլորտում` կոմիտեի կողմից առաջարկված թեմատիկ հարցերի շրջանակում: ՀՀ պատվիրակության ղեկավարը ներկայացրեց զեկույցը, ՄԱԿ-ի Խոշտանգումների և այլ դաժան, անմարդկային կամ նվաստացնող վերաբերմունքի և պատժի դեմ կոնվենցիայիով ՀՀ ստանձնած պարտավորությունների կատարման ընթացքը` օրենսդրական և պրակտիկայում արձանագրված բարեփոխումները, Հայաստանի Հանրապետության կողմից ձեռնարկված և նախատեսվող քայլերը:

Զեկույցի քննարկման ընթացքում Հայաստանի պատվիրակությունը պատասխանեց կոմիտեի անդամների կողմից բարձրացված հարցերին, մասնավորապես ներկայացնելով խոշտանգումների հասկացության սահմանման օրենսդրական ջանքերը, քրեակատարողական համակարգում, ոստիկանությունում որոշ բացասական երևույթների վերացմանն ուղղությամբ ձեռնարկված միջոցառումներն ու զարգացումները:

Զեկույցի քննարկմանը կհաջորդի կոմիտեի եզրակացությունների և առաջարկությունների ընդունումը:

ՄԱԿ-ի Խոշտանգումների դեմ կոմիտեն 10 անկախ փորձագետներից կազմված ՄԱԿ-ի պայմանագրային մարմին է, որը հսկում է Խոշտանգումների և այլ դաժան, անմարդկային կամ նվաստացնող վերաբերմունքի և պատժի դեմ կոնվենցիայի ընթացքը` 4 տարի պարբերականությամբ ներկայացվող զեկույցի միջոցով:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր